Облыс орталығынан тым алыс жатқан Созақтан телефон соғылды.
– "Айқын" газетіне айтпағымыз бар еді. Ел жиналып күтіп отыр. Халық ақыны Әселхан Қалыбековаға да айттық. Ол жолда күтіп тұрады. Ала келіңіз, – деген асығыс әңгімені кілт үзуге тура келді.
– Өзіңіз кімсіз? Не болып қалды? Дұрыстап түсіндірсеңізші, – дедік.
– Келген соң түсінесіздер ғой. Мен – Нұржамалмын. Есіңізде болар, он бес жыл трактор айдағанмын. Сіз де трактор айдағансыз. Талай жиындарда кездестік. Көрсеңіз танисыз мені. Ал шаруаға келсек, әкімімізді қорғайын деп жүрміз, – деді.
Гүрілдеген дауысына қарап, "еркек" деп тұрғаным, баяғы нәзік тракторшы қыз болып шықты. "Тракторшы әкімді неге қорғайды?" деген сұраққа жауап іздеп, Әселханға телефон соқтым. – Сен білмейтін шығарсың. Нұржамалдың қорғайын деп жүрген әкімі – ауыл әкімі. Ол әкімді кезінде "Айқын" газетіне мақтап жазған екенсіңдер. Нұржамалдың сөзіне қарасақ, оны "құртқалы" жатқан көрінеді. Ал ел-жұрт әкімді жақтайды екен, – деді.
Сонымен Созаққа бағыт алдық. Жиналған ел алдында қалай жауап беруді білу үшін алдымен Созақ ауданының әкімі Созақбай Әбдіқұловқа бардық.
– Ондай әкім өзіме де керек. Барлық көрсеткіштері бойынша алдыңғы орында келеді. Ауылдың жағдайы жақсы. Кезінде ауыл әкімі етіп өзім тағайындағанмын. Ел ішінен біреулер қайта-қайта арыз жазып, неше түрлі тексерулер келіп, әбден шаршап жүр. Қазір жұмыс істейтін адамға тыныштық болмайтын болды. Халықпен тіл табысып, елдің көңілінен шығып отырған әкімді қолдаймын да, қорғаймын да, – деді ол.
Аудан прокуроры Орал Монтаевқа да жолығып, "ауыл әкімінің біз білмейтін заңсыз әрекеттері бар ма" деп сұрадық.
– "Құмкент" ауылының әкімі жайлы ел жақсы пікірде. Ауданда рейтинг жоғары. Ешқандай заңсыз әрекеттерге барып отырған жоқ, – деді Орал да.
Шынында да, "Құмкент" ауылының әкімі Болат Айдарбеков "Айқынның" кейіпкері болып шықты. Газетте жыл басында "Әкім болсаң, Болаттай бол!" деген мақала жарияланған еді. Онда біз әкімнің қаһарлы қыста жоғалып кеткен қойшыны да, қойды да, үш жасар баланы да тапқанын жазып едік. Бірақ біз қаһарлы қыста мұнда жете алмағанбыз.
Тұрғындардың айтуынша, Болат Айдарбеков мұнда келісімен ауыл әкімдігінің ғимаратын қайта салуды қолға алған. Едені сынып, жер астына түскен екі бөлмелі ғимаратты бұзып, асарлатып, қазіргі заманға сай, жұрт ұялмай кіретіндей кеңсе етіп салған. Көпшіліктің ортасында балшық илеп, кірпіш тасып әкімнің өзі де бел ортада жүрген екен. Көктем шыға салысымен ауылға кіреберістен бастап үш шақырымдай жерге ағаш егіпті. Суы жоқ, жазық далаға тал өсіргенді де осы ауылдан көрдік. Қазір құмды даладан ауылға кіргенше жасыл желек жайқалып тұр. Одан соң жабылып жүріп мұражай ашқан, мәдениет ошағын жөндеп алған. Үлкен арықпен бұлақ басынан келетін су кешігіп келеді. Арықты қанша тазалағанмен жылдам өсетін балдырлар судың жолын бөгейді де жатады. Әкім бұған да жол тауыпты. Өз күштері келмеген соң, осы аймақта кен қазып жатқан жаңатастықтарға «ауылдың бір қажетін өтеп беріңдер» деп ауылға су келетін арықты бетондатыпты. Бұрын жиырма төрт сағатта келетін су он сегіз минөтте жетеді екен. Айтпақшы, ауыл өзіне имандылық үйін де салып алыпты.

Алматы облысының Алакөл ауданында, жақында Қытайдан келген бір азамат Enterovіrus-71 (EV71) инфекциясын жұқтырған деген күдік бар, деп хабарлады Төтенше жағдайлар жөніндегі министрліктен.
Ауырып дәрігерлерге қаралған 27 жастағы Қытайда туған азамат Қазақстанға 26 сәуірде келген екен. Ауырған адамға алдын ала тексеру сараптамасы бойынша ентеровирустық инфекцияны жұқтырған деген диагноз қойылған. Қазір оны аудандық ауруханада бөлек боксқа жатқызып, ауруды қарау үшін арнайы медициналық қызметкерлер бекітілген. "Ауданда эпидемияға қарсы шаралар жүргізіліп, ауырған адаммен қарым-қатынаста болғандар анықталуда, тұрғындар арасында түсініктеме жұмыстары жүргізілуде. Бұл дерек жайлы облыс басшылары құлақтандырылды, қазір инфекцияның таралу жолдарын жою бойынша бірлескен шаралар жасалып жатыр" дейді Төтенше жағдайлар жөніндегі министрліктің жедел мән беру департаменті бастығының орынбасары Александр Федоренко.
Enterovіrus-71 (EV71) инфекциясы Қытайдың орталық Аньхуэй провинциясындағы Фуян қаласынан басталған. Тіркелген 30 мыңға жуық науқастың көп ұзамай 22-сі көз жұмған. Қауіпті ауру 1998 жылы Гонконг аумағында тіркелген болатын. Ол кезде 129106 бала ауырып, оның 78-і қайтыс болған.
Enterovіrus-71 оңайлықпен залалсыздандырылмайды. Полиовирустар көкөністерде, сүт өнімдерінде 37 градус жылылықта 3-4 айға дейін сақталады. Ентеровирус инфекциясын тағамдар арқылы, үй мүліктері арқылы вирусты жұқтырған ауру адамдар таратады. Қан арқылы ентеровирустар адамды сал ауруына, энцефалиттік және асептикалық менингитке шалдықтыруы мүмкін. Вирусты жұқтырған адамның алдымен екі бетінде, еріндерінде, тілінде, тамағында ақшыл-қоңыр теңбілдер пайда болады. Екі-үш күн өткеннен кейін теңбіл адамның аяқ-қолдарына, алақанына жайылады. Әдетте дене ыстығы көтеріледі. Инфекция, әсіресе, 6-7 жасқа дейінгі балаларға тез жұғады. Сондықтан дәрігерлер тұрғындарды таза су ішіп, көкөністерді қайнаған сумен жуып жеуге, тазалық сақтауға шақырады.